उदयपुरबाट रसुवा बाढी प्रकोपपीडितलाई सहयोग जुट्दै

रसुवामा बुधबार आएको विनाशकारी बाढीबाट प्रभावित पीडितका लागि राहत सहयोग गर्नेहरू उदयपुरमा पनि बढ्दै गएका छन्। सरकारले प्रधानमन्त्री दैवी प्रकोप उद्धार कोष स्थापना गरी सहयोग आह्वान गरेसँगै देश–विदेशबाट जुट्न थालेको सहयोगमा उदयपुरले पनि योगदान गर्न थालेको हो।

व्यक्तिगत र संस्थागत रूपमा सहयोग दिने क्रममा त्रियुगा नगरपालिकाले १६ लाख रुपैयाँ सहयोग गर्ने निर्णय गरेको छ। रसुवा बाढीबाट प्रभावित नागरिकको उद्धार तथा राहतका लागि बिहीबार बसेको नगर कार्यपालिका बैठकले उक्त सहयोग गर्ने निर्णय गरेको नगरप्रमुख वसन्त बस्नेतले बताए।