भोटेकोशी बाढीपीडितका लागि गण्डकी सरकारको ४ करोड सहयोग

गण्डकी प्रदेश सरकारले भोटेकोशी बाढीपीडितको उद्धार, उपचार र राहतका लागि ४ करोड रुपैयाँ सहयोग गर्ने भएको छ। गण्डकी प्रदेशका मुख्यमन्त्री सुरेन्द्रराज पाण्डेले शुक्रबार एक अपिल जारी गर्दै भोटेकोशी नदीमा आएको बाढीका कारण रसुवासहित विभिन्न जिल्लाका प्रभावित नागरिकको उद्धार, उपचार र राहतका लागि प्रधानमन्त्री दैवी प्रकोप उद्धार तथा राहत कोषमा सो रकम प्रदान गर्ने निर्णय भएको जनाएका हुन्।

मुख्यमन्त्री पाण्डेले अपिलमा बाढीका कारण गण्डकी प्रदेशका विभिन्न जिल्लाबाट धार्मिक तथा अन्य यात्रामा गएका नागरिकहरू अझै पनि सम्पर्कमा नआउँदा चिन्ता बढाएको बताएका छन्। उनले सम्पर्कविहीन नागरिकको खोजीमा गण्डकी प्रदेश सरकारले समन्वय गरिरहेको उल्लेख गरेका छन्। अपिलमा भनिएको छ, ‘सम्पर्कविहीन नागरिकको खोजी, अवस्था पहिचान र भेटिएका शवको उचित व्यवस्थापनका लागि सम्बन्धित निकायसँग समन्वय भइरहेको छ।’