बाढीको क्षतिपछि नेपाल टेलिकमको सेवा पुन:लयमा, १,०९३ लाइन सञ्चालनमा

काठमाडौं । गत भदौ १० गते आएको अविरल बाढीका कारण रसुवागढी, बेत्रावती र त्रिशूली क्षेत्रमा नेपाल टेलिकमको फाइबर नेटवर्कमा गम्भीर क्षति पुगेकोमा पहिलो चरणको नेटवर्क पुन:सञ्चालन कार्य सम्पन्न भएको छ ।

बाढीका कारण रसुवागढी र बेत्रावतीमा एक/एक गरी दुईवटा ओएलटी (OLT), रसुवागढीमा एक, बेत्रावतीमा एक र त्रिशूलीमा तीन गरी पाँचवटा एफडीसी (FDC) तथा करिब १२८ किलोमिटर एरियल अप्टिकल फाइबर केबल (Aerial Optical Fiber Cable) बगाएका थिए । यसबाट उक्त क्षेत्रका कुल १ हजार ५४४ वटा एफटीटीएच (FTTH) लाइन पूर्ण रूपमा प्रभावित भएका थिए ।