सिँचाइ पुगेपछि रमौलीको कारोबार वार्षिक दुई अर्ब

मकवानपुरको मनहरी गाउँपालिका ७ स्थित रमौलीका कृष्ण राईले आफ्नै खेतमा मकै उम्रेला कि नउम्रेला भन्ने चिन्ताले रात कट्थे। सुक्खा बालुवामिसिएको जमिन, पानीको अभाव र हावाहुरीले उडाउने धुलोबिच खेती गर्नु उनका लागि संघर्ष मात्र थियो। कतिपय छिमेकीले त खेती गरेर गुजारा नचल्ने भएपछि जग्गै बेचेर अन्यत्र बसाइँ सरे। अब परिस्थिति फेरिएको छ। राईले अहिले करिब ७० बिघा जमिनमा धान, तरकारी र अन्य बाली लगाइरहेका छन्। ‘पहिला मकै पनि राम्रोसँग फल्दैनथ्यो। २०७३ सालदेखि सिँचाइको व्यवस्था भएपछि खेती गर्ने हिम्मत आयो, उनले विगत र अहिलेको अवस्था बताउँदै भने, ‘अहिले वर्षभरि खेत खाली हुँदैन।’

कृष्ण राईको यो कथा मकवानपुरको मनहरी गाउँपालिका–६ र ७ का रमौली र प्रतापपुरका अधिकांश किसानको कथा हो। एक दशकअघि घना झाडी, सालका रुख र सुक्खा बालुवाले ढाकिएको यो क्षेत्र अहिले अन्न तरकारी र दुध उत्पादनको केन्द्र बनेको छ।