कोन्टेले छोड्ने भए नापोली

रोम । नापोलीका मुख्य प्रशिक्षक एन्टोनियो कोन्टेले क्लब छोड्ने घोषणा गरेका छन्। नापोलीलाई सिरी ए को उपाधि दिलाएको १२ महिनापछि नै उनले क्लबबाट अलग हुने निर्णय लिएका हुन्।

चेल्सी र टोटनह्याम हट्सपरका पूर्व प्रशिक्षक समेत रहेका कोन्टेले सन् २०२४ मा नापोलीको कमान्ड सम्हालेका थिए। उनले क्लबमा आफ्नो पहिलो सिजनमै नापोलीलाई इतिहासको चौथो सिरी ए उपाधि दिलाउन सफल भए। यद्यपि यस सिजनमा भने नापोलीले आफ्नो उपाधि रक्षा गर्न सकेन र च्याम्पियन इन्टर मिलानभन्दा ११ अङ्कले पछि पर्दै तालिकाको दोस्रो स्थानमा चित्त बुझायो। कोन्टेका लागि सधैँ चुनौतीपूर्ण बन्दै आएको च्याम्पियन्स लिगमा पनि यसपटक नापोली नकआउट चरणमा पुग्न असफल रह्यो।