शिथिल अर्थतन्त्रको यथार्थबाट भागेको मौद्रिक नीति — कसरी उठ्छ बजारको खस्किँदो मनोबल ?

नेपाल राष्ट्र बैंकले सार्वजनिक गरेको आगामी आर्थिक वर्ष २०८३/८४ को मौद्रिक नीतिले मुलुकको वर्तमान आर्थिक संकटलाई निकास दिन नसकेको भन्दै चौतर्फी आलोचना सुरु भएको छ। वित्तीय प्रणालीमा प्रचुर तरलता (पैसा) थुप्रिए पनि बजार चलायमान हुन नसकेको वर्तमान विरोधाभासपूर्ण अवस्थामा आएको यो नीतिले निजी क्षेत्र, सेयर बजार र घरजग्गा व्यवसायमा छाएको निराशालाई चिर्न असफल भएको विश्लेषण गरिएको छ।

केन्द्रीय बैंकले पुरानै नीतिहरूलाई निरन्तरता दिँदै केही प्राविधिक सुधारमा मात्र जोड दिएकाले शिथिल अर्थतन्त्र उकास्ने ठोस मार्गचित्र आउन सकेको छैन। मौद्रिक नीतिले आगामी वर्ष निजी क्षेत्रतर्फको कर्जा विस्तारको लक्ष्य ११ प्रतिशत राखेको छ। अंकमा यो लक्ष्य सकारात्मक देखिए पनि विगतको अनुभवका कारण यसमा संशय पैदा भएको छ। विगतका वर्षहरूमा साढे १२ प्रतिशतको उच्च लक्ष्य राख्दासमेत त्यसको आधा मात्र कर्जा प्रवाह भएको पृष्ठभूमिमा अहिलेको ११ प्रतिशतको लक्ष्य कसरी भेटिन्छ भन्नेमा नीति मौन छ।