पैसाको लेनदेन विवादमा युवतीको हत्या

विराटनगर । झापाको रतुवा खोलामा १० दिनअघि बोराभित्र फेला परेको युवतीको शव प्रकरणको रहस्य खुलेको छ। पैसाको लेनदेनमा भएको विवादले उग्र रूप लिँदा २१ वर्षीया युवतीको हत्या भएको प्रहरी अनुसन्धानबाट खुलेको हो । हत्यामा संलग्न रहेको अभियोगमा प्रहरीले दमक–५ मा डेरा गरी बस्ने ३४ वर्षीय भारतीय नागरिक राकेश कुमार पण्डितलाई पक्राउ गरेको छ।

जिल्ला प्रहरी कार्यालय झापाले शुक्रबार पत्रकार सम्मेलन गर्दै दमक–८ की २१ वर्षीया रोमा भनिने रमा तिवारीको हत्यामा पण्डितको संलग्नता पुष्टि भएको जनाएको छ। भारतको बिहार, अररिया घर भएका पण्डित दमक क्षेत्रमा टायल्स तथा मार्बल जडानको ठेक्कापट्टा गर्ने मिस्त्री हुन्। गत जेठ १६ गते दमक–१० स्थित रतुवा खोलाको पुलमुनि सेतो बोरामा प्याक गरिएको अवस्थामा बेवारिसे शव भेटिएपछि प्रहरीले अनुसन्धान सुरु गरेको थियो।