फिलिपिन्समा भवन भत्किँदा ३ जनाको मृत्यु, १७ जना अझै बेपत्ता

काठमाडौँ । फिलिपिन्सको राजधानी मनिलाको उत्तरमा रहेको एन्जलस सहरमा निर्माणाधीन बहुमञ्जिला भवन भत्किँदा कम्तीमा तीन जनाको मृत्यु भएको छ भने १७ जना अझै बेपत्ता रहेका छन् । उद्धारकर्मीहरूले भग्नावशेषमुनि जीवित व्यक्तिको सङ्केत फेला परेपछि खोज तथा उद्धार अभियानलाई तीव्र बनाएका छन् ।

फिलिपिन्सको अग्नि नियन्त्रण विभागका अधिकारीहरूका अनुसार भग्नावशेषबाट दुई जनालाई जीवित अवस्थामा निकालिएको थियो । तर तीमध्ये एक जनाको उपचारका क्रममा मृत्यु भयो भने अर्का एक जनालाई बाहिर निकाल्नुअघि नै हृदयघात भएको थियो ।