ऐश्वर्यालाई ट्रोल गर्नेलाई कंगनाको जवाफ : रेड कार्पेटमा पाका महिला हेर्ने बानी बसाल्नुस्

बलिउड अभिनेत्री कंगना रनौतले ऐश्वर्या राय बच्चनलाई ट्रोल गर्नेहरूको कडा आलोचना गरेकी छिन्। हरेक वर्ष जस्तै यस वर्ष पनि ऐश्वर्या फ्रान्सको कान्स फिल्म फेस्टिभलको हिस्सा बनिन्, जहाँ उनका तस्बिरहरू भाइरल भए। केहीले उनको ग्लोबल स्टारडमको प्रशंसा गरिरहेका छन् भने केहीले उनको लुक्स र बढेको तौललाई लिएर ‘फ्याट आन्टी’ भन्दै ट्रोल गरिरहेका छन्।

यस विषयमा कंगनाले आफ्नो आधिकारिक सामाजिक सञ्जाल खाताबाट ऐश्वर्याको तस्बिर सेयर गर्दै ती ट्रोलहरूलाई जवाफ दिएकी छिन्। कंगनाले लेखेकी छिन्, ‘फेसन र स्टाइल व्यक्तिको पहिचान र आफूलाई व्यक्त गर्ने तरिका हो। यो जीवन र मनोवृत्तिको आफ्नै व्याख्या हो। कसैलाई पनि खुसी पार्न वा प्रमाणित गर्न कुनै पनि महिला जिम्मेवार हुँदैनन्। ऐश निकै सुन्दर देखिएकी छिन्। जो उनलाई कुनै अन्य तरिकामा हेर्न चाहन्छन्, उनीहरूले पहिले आफैमा के विशेष छ भनेर देखाउन्।’