मिर्गौला प्रत्यारोपणपछि पनि सगरमाथाको शिखर चुमेका पेम्बा

काठमाडौँ । जीवनका उकाली–ओरालीमा जतिसुकै ठुला आँधी आए पनि सोलुखुम्बुका पेम्बा शेर्पालाई ढलाउन सक्दैन । उनी यति कठोर बनिसकेका छन् कि कुनै सङ्कटले उनको आत्मबल गलाउन सक्दैन ।

३७ वर्षीय पेम्बाले मिर्गौला प्रत्यारोपणपछि सगरमाथाको शिखर चुम्ने पहिलो व्यक्तिका रूपमा आफ्नो नाम दर्ज गराइसकेका छन् । आफ्नै बुबाले दिएको मिर्गौला प्रत्यारोपण गरेका यी आरोहीको यात्रा यत्तिमै रोकिएको छैन । सात वटै महादेशका सर्वोच्च शिखर चढ्ने प्रणका साथ उनी कम्मर कसेर अघि बढिरहेका छन् । सोही अनुसार उनले सगरमाथा आरोहणलाई पहिलो अध्याय बनाए ।