राष्ट्रिय सभा अध्यक्ष भन्छन् - दुई तिहाइको संख्याले मात्र देशमा स्थिरता आउँदैन

काठमाडौँ । राष्ट्रिय सभाका अध्यक्ष नारायणप्रसाद दाहालले दुई तिहाइको सरकार बन्ने बित्तिकै देशमा राजनीतिक स्थिरता सुनिश्चित नहुने बताएका छन्। सोमबार नेपाल पत्रकार महासङ्घको प्रतिनिधिमण्डलसँगको भेटघाटका क्रममा उनले दुई तिहाइको सरकार बनेकै आधारमा मात्र देशमा राजनीतिक स्थायित्व कायम हुन नसक्ने कुरा व्यक्त गरेका हुन्।

नेपालमा यसअघि पनि दुई तिहाइ र स्पष्ट बहुमत भएका सरकारहरू बने पनि तिनले पूरा कार्यकाल टिकाउन नसकेको इतिहास स्मरण गराउँदै अध्यक्ष दाहालले राजनीतिक स्थायित्वका लागि सङ्ख्याभन्दा पनि दीर्घकालीन योजना महत्वपूर्ण हुने दाबी गरे। सरकारको सफलता स्पष्ट योजना, जनताको आवश्यकता पहिचान र तत्कालीन समस्याको समाधानमा निर्भर रहने उनको भनाइ थियो।