भोटेकोशी बाढीको आर्थिक असर व्यापक, पर्यटनदेखि विद्युत् निर्यातसम्म प्रभावित

काठमाडौँ। भोटेकोशी बाढीले मानवीय र भौतिक क्षतिसँगै नेपालको विदेशी मुद्रा आम्दानीका दुई महत्वपूर्ण आधार पर्यटन र विद्युत् निर्यातमा समेत धक्का दिएको छ। बाढी प्रभावित क्षेत्रको नकारात्मक समाचार र सडक तथा पूर्वाधारमा भएको क्षतिले देशका अन्य सुरक्षित पर्यटकीय गन्तव्यको बुकिङसमेत प्रभावित हुन थालेको छ भने जलविद्युत् आयोजना र प्रसारण संरचनामा क्षति पुग्दा विद्युत् निर्यात घटेको छ।

शरद् ऋतुको मुख्य पर्यटकीय सिजनमा नेपाल आउने पर्यटकको बुकिङमा ठूलो कमी आउन सक्ने र केही व्यवसायीले करिब ३० प्रतिशतसम्म बुकिङ रद्द हुने जोखिम औंल्याएका छन्। नेपालको सेवा निर्यातमा यात्रा तथा पर्यटनको हिस्सा करिब ३८ प्रतिशत रहेको रिपोर्टमा उल्लेख छ।