मन्त्रीको अभिव्यक्तिप्रति ग्यास उद्योगीको आपत्ति: ‘बिना प्रमाण दोष नलगाऊ’

काठमाडौं– उद्योग, वाणिज्य तथा आपूर्तिमन्त्री गौरी कुमारी यादवले एलपी ग्यास उद्योगीप्रति दिएको विवादित अभिव्यक्तिप्रति नेपाल एलपी ग्यास उद्योग संघले गम्भीर आपत्ति जनाएको छ। प्राकृतिक विपद्का कारण ग्यास आपूर्ति प्रभावित भइरहेका बेला उद्योगीहरूलाई दोषी देखाउने तथा भौतिक कारबाहीको संकेत गर्ने अभिव्यक्ति गैरजिम्मेवार र आपत्तिजनक भएको संघको भनाइ छ।

संघले बिहीबार जारी गरेको विज्ञप्तिमा नेपालमा एलपी ग्यासको कारोबार गर्ने उद्योगहरूले पाँच दशकभन्दा लामो समयदेखि निरन्तर सेवा दिँदै आएको उल्लेख गरेको छ। विभिन्न विपद् तथा महाविपद्का समयमा समेत उपभोक्तालाई सहज रूपमा ग्यास उपलब्ध गराउन उद्योगीहरूले आफ्ना सम्पूर्ण स्रोतसाधन परिचालन गर्दै आएको संघले जनाएको छ।