कोशीबाट संगीत रोयल्टी संकलन सुरु, नतिरेमा सवारीको नवीकरण रोकिने

विराटनगर : सार्वजनिक रूपमा गीत–संगीत बजाएर व्यवसाय सञ्चालन गर्ने तथा त्यसबाट प्रत्यक्ष वा अप्रत्यक्ष लाभ लिने व्यक्ति, संस्था र व्यवसाय अब संगीत रोयल्टी तिर्न बाध्य हुने भएका छन्।

वर्षौंदेखि कानुनमा व्यवस्था भए पनि प्रभावकारी रूपमा कार्यान्वयन हुन नसकेको रोयल्टी प्रणालीलाई कोशी प्रदेशबाट व्यवहारमा लागू गरिएको हो। संगीत रोयल्टी संकलन समाज, प्रस्तोता समाज नेपाल र संगीत तथा चलचित्र उत्पादक समाजको संयुक्त अधिकारअन्तर्गत एमएमएस नेपालले बिहीबारदेखि कोशी प्रदेशका विभिन्न यातायात कार्यालयमार्फत रोयल्टी संकलन अभियान सुरु गरेको हो। अभियानको पहिलो चरण सार्वजनिक सवारीसाधनबाट सुरु गरिएको छ।