चिया किसान र श्रमिकका समस्या तत्काल समाधान गर्न संसदीय समितिको निर्देशन

काठमाडौँ । राष्ट्रिय सभाको विकास, आर्थिक मामिला तथा सुशासन समितिले चिया किसान तथा चिया बगानमा कार्यरत श्रमिकहरूको समस्या तत्काल समाधान गर्न सरकारलाई निर्देशन दिएको छ। बिहीबार बसेको समितिको बैठकले चिया क्षेत्रमा देखा परेका गम्भीर समस्याहरूलाई अविलम्ब सम्बोधन गर्न सरकारको ध्यानाकर्षण गराउँदै यस्तो निर्देशन दिएको हो।

समिति सभापति कृष्णप्रसाद पौडेलले चिया किसान र श्रमिकका समस्या समाधानसँगै अलैँची, सुपारी, बेसार, अदुवा, कफी लगायतका अन्य नगदेबालीको मूल्य निर्धारण तथा बजार व्यवस्थापनलाई प्रभावकारी बनाउन सरकारसँग आग्रह गरे। नगदेबाली उत्पादन गर्ने किसानहरूले उचित मूल्य र सुनिश्चित बजार पाउन नसकेको भन्दै उनले यी बालीहरूको व्यवस्थित बजार प्रणाली विकासका लागि आवश्यक कानूनी व्यवस्था गर्न समेत सरकारसमक्ष माग गरे।