भूकम्पले चर्किए लोमान्थाङका सयौं घर

भूकम्पले हिमालपारिको जिल्ला मुस्ताङको माथिल्लो क्षेत्रका घरमा व्यापक क्षति गरेको छ। गत मंगलबार राती ९ बजेर ५३ मिनेट जाँदा मुस्ताङको लोमान्थाङ केन्द्रबिन्दु भएर ५.३ म्याग्निच्यूटको भूकम्प गएको थियो। भूकम्पले त्यहाँका घर, गुम्बा, विद्यालयका भवन चर्केका छन्। कतिपय भवन भत्किने अवस्थामा पुगेको स्थानीयले बताएका छन्। भूकम्प पछि पनि बारम्बार धक्का महसुस गरेको स्थानीयले बताएका छन्।

लोमान्थाङ गाउँपालिकाका अध्यक्ष टसी न्ह्र्वु गुरुङका अनुसार गाउँपालिकाका अधिकांश माटोको घर चर्केका छन्। कतिपय घर त भत्किने अवस्थामा पनि पुगेको उनले बताए। भूकम्प र त्यसपछिका बारम्बार आएका धक्कापछि स्थानीयहरु घरबाहिर टेन्ट टाँगेर बसेका छन्। दिनमा घर फर्किने र राती बाहिर खुला चौरमा टेन्ट टाँगेर सुत्ने गरेको उनले बताए।