डेढ महिनासम्म कर्णालीका मुख्यमन्त्रीले न सचिवालय गठन गरे, न त सरकारको कार्ययोजना ल्याए

सुर्खेत । मंगलबहादुर शाहीले कर्णाली सरकारको नेतृत्व सम्हालेको बिहीबार ४५ दिन पुग्यो । यो अवधिमा उनले आफ्नो सचिवालय गठनसमेत गर्न सकेका छैनन् भने सरकारको कार्ययोजनाबारे पनि अन्योल छ ।

साउन १२ गते नेकपा एमालेको समर्थनमा मुख्यमन्त्री नियुक्त भएका शाहीले भदौ ३ गते संसद्बाट विश्वासको मत लिएका थिए । सोही दिन सत्ता साझेदार दल एमालेबाट उनले ३ जना मन्त्री नियुक्त गरे । भदौ ११ गते आफ्नो दल नेपाली कम्युनिस्ट पार्टीबाट थप ३ जना मन्त्री नियुक्त गरेर उनले मन्त्रिपरिषद्लाई पूर्णता दिए ।