रास्वपाका केही सांसद बढाउन खोज्दैछन् क्षेत्राधिकार नै नजोडिने ‘महाभियोगको उजुरी’

२५ भदौ, काठमाडौं । रास्वपाका केही सांसदहरू सरकार आफ्नो भएपनि सत्ता आफ्नो नभएको बुझाइमा छन् । गृहमन्त्री सुधन गुरुङले जेनजी शहीद स्मृति दिवसका दिन मंगलबार विवादास्पद धर्मगुरु लगेर कार्यक्रम गरेको भन्दै उनकै पार्टीकी संसदीय दल सचेतक क्रान्तिशिखा धितालले आपत्ति जनाएपछि यो बुझाइ अरु छताछुल्ल हुन पुगेको थियो ।

बुधबार रास्वपाका जेनजी सांसदहरूको ह्वाट्सअप ग्रुपमा गृहमन्त्री सुधनले सचेतक क्रान्तिशिखालाई धम्कीपूर्ण मेसेज लेखेपछि उनले प्रतिवाद गरेकी थिइन् । सुधन र क्रान्तिशिखा दुवैलाई थुम्थुम्याउने क्रममा रास्वपा सांसद सुशान्त वैदिकले लेखेका थिए, ‘माननीयज्युहरू, केही अलमल र विवाद भए बसेर सुल्झाऔं, सरकार हाम्रो भए पनि सत्ता हाम्रो भइसकेको छैन। न्यायपालिकामा अप्ठ्यारो छ। कसरी जाने भन्ने योजना बनाऔं ।’