‘हजुरआमाको शव सिटी सफारीमा, सेवाअभावको पीडादायी दृश्य’

सुन्दरहरैंचा (मोरङ) । मोरङको कानेपोखरी गाउँपालिका–२, केरौनमा एम्बुलेन्स र शववाहन सेवाको अभावले एक परिवारले अत्यन्तै पीडादायी अवस्था भोग्नुपरेको छ। बिरामी अवस्थामा अस्पताल पुर्‍याइएकी एक वृद्ध महिलाको मृत्यु भएपछि उनको शव घरसम्म ल्याउन कुनै पनि सरकारी वा निजी सेवा उपलब्ध नभएपछि परिवार अन्ततः सिटी सफारीको सहारा लिन बाध्य भएको हो।

स्थानीय घुर्नी ऋषिदेवलाई स्वास्थ्य अवस्था गम्भीर भएपछि परिवारले तत्काल कानेपोखरी अस्पताल पुर्‍याएको थियो। तर अस्पताल पुगेपछि चिकित्सकले उनलाई मृत घोषणा गरेका थिए। त्यसपछि परिवारले शव घरसम्म ल्याउन एम्बुलेन्सको व्यवस्था गर्न खोजे पनि शव ओसार्न एम्बुलेन्सले अस्वीकार गरेको पीडित परिवारको भनाइ छ।