जलविद्युत् आयोजनाबाट निस्किएको ‘मकिङ’ व्यवस्थापनमा लापरवाही, म्याग्दीमा पहिरो र कटान बढेको स्थानीयको गुनासो

म्याग्दी । म्याग्दी जिल्लाको धवलागिरि गाउँपालिका–७ स्यानखण्ड क्षेत्रमा अपर म्याग्दी–१ जलविद्युत् आयोजनाको निर्माणका क्रममा निस्किएको माटो तथा सुरुङबाट निकालिएको ‘मकिङ’ (गेगर) को अव्यवस्थित व्यवस्थापनका कारण म्याग्दी नदीमा कटान र पहिरोको जोखिम बढेको भन्दै स्थानीयवासीले गुनासो गरेका छन्।

५३.५ मेगावाट क्षमताको उक्त आयोजनाको विद्युत्गृह निर्माणस्थलबाट निकालिएको माटो नदी किनारमा जथाभावी थुपारिँदा नदीले धार परिवर्तन गरेको र त्यसको प्रत्यक्ष असर स्यानखण्डस्थित खेतीयोग्य जमिन, केरा बगैँचा तथा निजी वनमा परेको स्थानीयको भनाइ छ।