उमेर र सेवा अवधिका आधारमा अवकाश

सरकारले ३० वर्ष सेवा अवधि पूरा गरेका वा ५५ वर्ष उमेर पुगेकामध्ये जुन पहिले पूरा हुन्छ, त्यही आधारमा निजामती सेवाका कर्मचारीलाई अवकाश दिने गरी कानुन ल्याउँदै छ । यसको मस्यौदा तयार भएर अर्थ मन्त्रालयको सहमति लिई परिमार्जनका लागि कानुन मन्त्रालयमा पुगेको खबर छ । कानुन मन्त्रालयबाट अन्तिम मस्यौदा तयार भई प्राप्त भएपश्चात् यसलाई संविधानतः लोकसेवा आयोगको परामर्श लिई विधेयकका रूपमा कानुन बनाउन मन्त्रिपरिषद्मार्फत संसद्मा पेस गर्नुपर्ने हुन्छ ।

हालसम्मको तयारी हेर्दा ५० प्रतिशतभन्दा बढी काम यस प्रयोजनको लागि पूरा भइसकेको छ । यो प्रावधान एकपटकका लागि मात्र भनिएको छ । यस प्रकारको ऐन आउन लागेको सन्दर्भमा यतिखेर निजामती सेवाभित्र पनि चर्चाको विषय बनिराखेको छ । यस व्यवस्थाअनुसार कर्मचारीहरू करिब १० हजारको संख्यामा निजामती सेवाबाट एकै दिन अवकाश प्राप्त गर्ने अनुमान गरिएको छ । करिब ५५ हजारको संघीय निजामती सेवाभित्र १० हजार (करिब २० प्रतिशत) कर्मचारी एकैपटक अवकाशमा जाने भनेको ठूलै संख्या हो ।