काठमाडौंमा ‘ड्रोन कन्फरेन्स एन्ड एक्जिबिसन’ आयोजना हुँदै, ३० भन्दा बढी कम्पनी सहभागी बन्ने

काठमाडौं । काठमाडौंमा ‘ड्रोन कन्फरेन्स एन्ड एक्जिबिसन’ आयोजना हुने भएको छ । दरबारमार्गस्थित होटल याक एन्ड यतीमा २५ सेप्टेम्बरमा उक्त कन्फेरेन्स आयोजना हुन लागेको हो । ड्रोन हब नेपालको मुख्य आयोजना तथा एसियन इन्स्टिच्युट अफ आर्टिफिसियल इन्टेलिजेन्स (एआईएआई) र इन-स्पान सेन्टर अफ एक्सिलेन्सको सहकार्यमा उक्त कार्यक्रम आयोजना हुन लागेको हो । यस कार्यक्रममा भारतीय दूतावासको समेत सहयोग रहेको छ ।

आयोजकका अनुसार ‘विकासका लागि ड्रोन: नेपाल र बाहिरका लागि एआई-सञ्चालित समाधानहरू’ भन्ने मूल नाराका साथ आयोजना हुने यस सम्मेलनमा नेपाल, भारत र युरोपमा भइरहेको ड्रोनको प्रयोगबारे अनुभव आदानप्रदान हुनेछ । सम्मेलनमा ड्रोनको उचित व्यावसायिक प्रयोगका लागि आवश्यक नीतिगत बहस समेत हुने बताइएको छ । नेपाल विश्वविद्यालय, लुम्बिनी प्राविधिक विश्वविद्यालय र मधेश विश्वविद्यालयले शैक्षिक साझेदारका रूपमा सहभागिता जनाउने छन् ।