कर्णाली सरकारको नीति-कार्यक्रम : क्षणिक लोकप्रियतामै सीमित

छोरीमाथि हुने सबै प्रकारका हिंसा अन्त्यका लागि कर्णाली प्रदेश सरकारले आर्थिक वर्ष २०७६/७७ मा नीति तथा कार्यक्रममा ‘बैंक खाता छोरीको : सुरक्षा जीवनभरि’को कार्यक्रम सार्वजनिक गर्‍यो। नीति तथा कार्यक्रमअनुसार २०७६ साउन १ गतेयता जन्मिएका छोरीहरूको खाता खोल्दा सुरुमा एक हजार र त्यसपछि मासिक पाँच सय रुपैयाँ जम्मा गरिदिन थालियो। छोरीमाथि हुने हिंसा, भ्रूण हत्या, छोरीलाई न्यूनतम माध्यमिक शिक्षासम्मको पहुँच, लैंगिक विभेदको अन्त्य, उमेर नपुग्दै हुने विवाह न्यूनीकरणका लागि ल्याइएको यो कार्यक्रममा कर्णालीका ४१ हजार ५९७ छोरी जोडिए।

दुई आर्थिक वर्षमा सरकारले नौ करोड ८४ लाख रुपैयाँ स्थानीय तहमार्फत कर्णालीका ११ हजार ४१५ छोरीको खातामा जम्मा गरिदियो। त्यसपछि भने सरकारले छोरीहरूका लागि रकम छुट्याउन छोड्यो। ‘जुन तामझामका साथ प्रदेश सरकारले यो कार्यक्रम ल्याएको थियो, त्यसको औचित्य पुष्टि नगरेरै बन्द गरियो,’ गुर्भाकोट नगरपालिकाका उपमेयर मैना विकले भनिन्, ‘सरकारले पैसा दिन्छ भनेर छोरीहरूको खाता खोलेका अभिभावकहरूलाई यसले निराश बनाएको छ।’ प्रदेश सरकारले कार्यक्रमलाई निरन्तरता नदिएपछि जन्मिएका छोरीहरूको खाता खोल्ने क्रम पनि अहिले रोकिएको छ।