पानीमा डुबेर र बगेर बर्सेनि सयौंको ज्यान गइरहेको छ, सरकारको ध्यान जाओस् : सांसद गजुरेल

१२ जेठ, काठमाडौं । राष्ट्रिय स्वतन्त्र पार्टी (रास्वपा)का सांसद आशिष गजुरेलले पानीमा डुबेर र बगेर बर्सेनि सयौंको ज्यान गइरहेको बताएका छन् । सोमबार प्रतिनिधिसभाको बैठकमा आकस्मिक समयमा बोल्दै उनले यसमा सरकारको ध्यान जानुपर्ने आग्रह गरेका छन् ।

नेपाल प्रहरीको तथ्यांक उद्धृत गर्दै उनले बर्सेनि करिब ४ सय जनाको डुबेर वा बगेर मृत्यु हुने गरेको बताए । विश्व स्वास्थ्य संगठनका अनुसार नेपालमा पानीमा बगेर र डुबेर १५ सयसम्मको मृत्यु हुने गरेको उनले सुनाए । पीडितमध्ये आधा भन्दा धेरै २५ वर्ष मुनिका रहेको उनले बताए ।