लुम्बिनीमा अपेक्षित हुन सकेन रोपाइँ

आधा असार हुन लाग्दा लुम्बिनी प्रदेशका जिल्लामा अपेक्षित रोपाइँ हुन सकेको छैन। लुम्बिनी प्रदेश सरकार कृषि, भूमि व्यवस्था तथा सहकारी मन्त्रालयका अनुसार विगतमा मध्य असारसम्म ५० प्रतिशत हाराहारी रोपाइँ हुने गरेकोमा अहिले त्यस्तो हुन सकेको छैन। प्रदेशका १२ वटै जिल्लामा अपेक्षित रोपाइँ हुन नसकेको हो।

लुम्बिनी प्रदेशका १२ जिल्लामा खेतीयोग्य जमिन ६ लाख ७९ हजार ६ सय १३ हेक्टर छ। कुल खेतीयोग्य जमिनमध्ये तीन लाख एक हजार तीन सय ७२ हेक्टरमा धान खेती गरिन्छ। धान खेती हुँदै आएको जमिनमध्य ३९ हजार १२७.८१ हेक्टरमा रोपाइँ भएको जानकारी मन्त्रालयका सूचना अधिकारी हरिप्रसाद पण्डितले दिए। यसको अर्थ हो अहिलेसम्म प्रदेशभित्र १२.९८ हेक्टरमा रोपाइँ भएको छ। प्रदेशका १२ जिल्लामध्य दुईमा अहिलेसम्म रोपाइँ हुन नसकेको मन्त्रालयको तथ्यांक छ। १२ जिल्लामध्य सबैभन्दा बढी ६६ हजार २६५ हेक्टरमा धान खेती हुने कपिलवस्तुमा रोपाइँ नै हुन नसकेको तथ्यांक मन्त्रालयसँग छ।