सरकारले संस्थागत स्थायित्व र संवैधानिक मर्यादामाथि प्रहार गर्‍यो : खुस्बु ओली

काठमाडौँ । राष्ट्रिय प्रजातन्त्र पार्टीकी सांसद खुस्बु ओलीले सरकारका पछिल्ला गतिविधिहरूले मुलुकको संवैधानिक मर्यादा, सार्वभौमिकता र संस्थागत स्थायित्व माथि गम्भीर प्रश्न खडा गरेको बताएकी छन् । प्रतिनिधिसभाको शुक्रबारको बैठकमा बोल्दै सांसद ओलीले प्रधानमन्त्री कार्यालयबाट भइरहेका कार्यशैलीप्रति आपत्ति जनाइन् ।

ओलीले प्रधानमन्त्री कार्यालयका सल्लाहकार र सहयोगीहरूले अख्तियार दुरुपयोग अनुसन्धान आयोगका पदाधिकारीहरूलाई झण्डै ९ घण्टासम्म नियन्त्रणमा राखेर आफू अनुकूल कदम चाल्न दबाब दिएको समाचार सार्वजनिक भएको भन्दै सरकारसँग स्पष्टीकरण माग गरिन् । ‘यदि यो समाचार सत्य हो भने यो संवैधानिक निकायको स्वतन्त्रतामाथि गरिएको प्रत्यक्ष हस्तक्षेप हो,’ उनले भनिन् ।