ब्रिक्स सम्मेलनका लागि भारत आए पुटिन, इरान र युक्रेन युद्धको छायामा कस्तो होला शिखर बैठक ?

नयाँ दिल्ली । रुसी राष्ट्रपति भ्लादिमिर पुटिन दुईदिने ब्रिक्स शिखर सम्मेलनमा सहभागी हुन शुक्रबार भारतको राजधानी नयाँदिल्ली आइपुगेका छन् । विश्वका प्रमुख उदीयमान अर्थतन्त्रहरूको समूह ब्रिक्सको यसपटकको सम्मेलनमा मध्यपूर्वमा जारी युद्ध, युक्रेन युद्ध तथा विश्व अर्थतन्त्रका चुनौती प्रमुख एजेन्डा बन्ने देखिएको छ । पुटिनसँगै इरानी राष्ट्रपति मसुद पेजेस्कियान पनि भारतीय प्रधानमन्त्री नरेन्द्र मोदीसँग भेटवार्ता गर्ने कार्यक्रम छ । चिनियाँ राष्ट्रपति सी चिनफिङले पनि सम्मेलनका क्रममा मोदीसँग छुट्टै भेटवार्ता गर्ने अपेक्षा गरिएको छ ।

पुटिन नयाँदिल्लीस्थित पालम एयर फोर्स स्टेसनमा अवतरण गरेका थिए । उनलाई भारतका विदेश राज्यमन्त्री कीर्ति वर्धन सिंहले स्वागत गरेका थिए । पुटिनको भारत भ्रमणलाई लिएर राजधानी नयाँदिल्लीमा सुरक्षा व्यवस्था कडा पारिएको छ । सडकहरूमा भारतीय प्रधानमन्त्री मोदीका तस्बिरसहितका पोस्टर राखिएका छन् भने मध्यदिल्लीका विभिन्न क्षेत्रमा ट्राफिक प्रतिबन्धसमेत लगाइएको छ । दिल्ली प्रहरीले ठूलो संख्यामा सुरक्षाकर्मी परिचालन गरेको छ । सर्वसाधारणलाई सुरक्षा व्यवस्थामा सहयोग गर्न र सडकमा हुने ट्राफिक अवरोधप्रति धैर्य गर्न आग्रह गरिएको छ ।