पाठ्यक्रममा एआईदेखि उद्यमशीलतासम्म, सातै प्रदेशबाट आयो यस्तो सुझाव

काठमाडौं । राष्ट्रिय पाठ्यक्रम प्रारूप, २०७६ परिमार्जनका लागि सातै प्रदेशमा गरिएको सरोकारवालाको छलफलबाट पाठ्यभार घटाउनेदेखि कृत्रिम बौद्धिकता (एआई) लाई पाठ्यक्रमको हिस्सा बनाउनेसम्मका सुझाव आएका छन् ।

पाठ्यक्रम विकास केन्द्रले गरेको प्रदेशस्तरीय कार्यशालामा सहभागी शिक्षक, विद्यार्थी, अभिभावक, प्रधानाध्यापक, शिक्षाविज्ञ, स्थानीय तहका प्रतिनिधि तथा अन्य सरोकारवालाले विद्यमान पाठ्यक्रमलाई समयअनुकूल, व्यवहारिक र जीवनोपयोगी बनाउनुपर्नेमा जोड दिएका हुन् ।