वन्यजन्तु अपराध नियन्त्रणमा क्षेत्रीय सहकार्य आवश्यक: परराष्ट्रमन्त्री खनाल

काठमाडौँ, भदौ २६ गते । परराष्ट्रमन्त्री शिशिर खनालले दक्षिण एसियामा वन्यजन्तु अपराध नियन्त्रण र जैविक विविधता संरक्षणका लागि क्षेत्रीय सहकार्यलाई थप सुदृढ बनाउनुपर्ने धारणा राख्नुभएको छ । उहाँले सीमापार हुने वन्यजन्तु अपराध नियन्त्रणका लागि सम्बन्धित मुलुकका निकायबीच प्रभावकारी समन्वय र सूचना आदानप्रदानमा जोड दिनुभयो ।

दक्षिण एसिया वन्यजन्तु अपराध नियन्त्रण सञ्जालको पहिलो महासभाका अवसरमा काठमाडौँमा आयोजित स्वागत समारोहलाई सम्बोधन गर्दै मन्त्री खनालले वन्यजन्तुको अवैध व्यापार अन्तर्राष्ट्रिय सुरक्षाका लागि समेत बढ्दो चुनौतीका रूपमा देखापरेको उल्लेख गर्नुभयो ।