४ लाख ३० हजार वर्ष पुराना काठका हाते औजार फेला

वैज्ञानिकहरूले मानव इतिहासमै पहिलो पटक प्रयोग गरिएका सबैभन्दा पुराना काठका हाते औजारहरू फेला पारेका छन्। ग्रीसको एक प्राचीन तालको किनारमा भेटिएका यी परम्परागत औजारहरू करिब ४ लाख ३० हजार वर्ष पुराना रहेकाे खाेजकर्ताहरुकाे दाबी छ ।

खोजिएको ठाउँमा काठका औजारका साथै ढुङ्गे औजार र प्राचीन हात्तीका अवशेषहरू पनि भेटिएका छन्। यसले आदिम मानवहरूले तालको किनारमा जनावरहरूको सिकार गर्ने र मासु काट्ने गर्थे भन्ने देखाउँछ। ढुङ्गा जस्तो काठ लामो समयसम्म सुरक्षित रहन गाह्रो हुने भए पनि त्यहाँको विशेष वातावरणका कारण यी औजारहरू जोगिएका हुन्। वैज्ञानिकहरूका अनुसार यी काठका लौराहरू जमिन खन्न वा रुखको बोक्रा निकाल्न प्रयोग गरिन्थ्यो।