हराभरा बन्दै टुँडिखेल, मङ्सिरसम्म सकिनेछ काम

काठमाडौँ । राजधानीको मुटुमा रहेको टुँडिखेलको फेरिएको स्वरुपलाई नियाल्दै रहेका कैलालीका युवा ललितकुमार कलेललाई विदेशमा पुगेजस्तो अनुभूति भयो । “अन्य देशका सहरमा जताततै यस्तै खुल्ला हरियो चौर देखिन्थ्यो, अहिले आफ्नै देशको राजधानीमा देख्न पाइयो, गर्न चाह्यो भने नहुने के छ र !” उनले भने ।

चार वर्षअघि काठमाडौँ आउँदा टुँडिखेलमा हिलो हुने, खाल्डाखुल्डी हुने र हिँड्नसमेत गाह्रो हुने अवस्था थियो । अहिले खाल्डाखुल्डी पुर्ने र दुबो रोपेर हरियाली भएको देख्दा केहीबेर यहीँ आराम गरेर बसेको उनले सुनाए । उनले टुँडिखेल व्यवस्थित भएपछि सर्वसाधारणले यहाँ घुम्ने, फोटो खिच्ने, सामाजिक सञ्जालका लागि सामग्री बनाउने तथा मनोरञ्जन गर्ने वातावरण बन्ने बताए ।