‘ग्रिन आर्मी’ को सैन्य पहिचानमाथि सर्वोच्चमा रिट, भोटेकोसी उद्धारदेखि संस्थाको दर्तासम्म प्रश्न

काठमाडौं- विपद्का बेला उद्धार तथा राहतमा खटिएको ‘ग्रिन आर्मी नेपाल’ ले प्रयोग गर्दै आएको सैनिक शैलीको पोसाक, दर्जा र संरचनालाई लिएर सर्वोच्च अदालतमा कानुनी चुनौती परेको छ ।

नेपाली सेनासँग मिल्दोजुल्दो पहिचान बनाएर गैरसरकारी संस्था सञ्चालन गरिएको दावी गर्दै अधिवक्ताहरू साम्बराज अर्याल, पूर्णबहादुर साउद, गोविन्दराम परियार र विष्णुवर सिंह थापाले शुक्रबार सर्वोच्चमा रिट दायर गरेका हुन् । रिटमा ‘ग्रिन आर्मी नेपाल’सहित प्रधानमन्त्री तथा मन्त्रिपरिषद्को कार्यालय, गृह मन्त्रालय, रक्षा मन्त्रालय, नेपाली सेना, नेपाल प्रहरी, सशस्त्र प्रहरी बल, समाज कल्याण परिषद्, काठमाडौं जिल्ला प्रशासन कार्यालय, गोकर्णेश्वर नगरपालिका र कम्पनी रजिस्ट्रारको कार्यालयलाई विपक्षी बनाइएको छ। रिटको प्रारम्भिक सुनुवाइ सोमबारका लागि तोकिएको छ ।