सडकमै बच्चा जन्माएकाबारे रास्वपा सांसद : सरकारलाई असफल बनाउन महिला प्रयोग गरिएको हुनसक्छ

काठमाडौं – सप्तरीको राजविराजस्थित गजेन्द्रनारायण सिंह अस्पतालको मूल गेटबाहिर एक महिलाले बच्चा जन्माएको घटना सार्वजनिक भएपछि त्यसबारे चर्को बहस भइरहेको छ । अस्पतालले उपचारका लागि भर्ना नलिएपछि पैसा अभावमा ती महिला अस्पतालबाहिरै सुत्केरी हुन बाध्य भएको परिवारजन तथा सांसदहरूले आरोप लगाएका छन् ।

राजविराज नगरपालिका–१४ की ३० वर्षीया बविता कुमारी पासवान प्रसव व्यथा लागेपछि बुधबार राति गजेन्द्रनारायण सिंह अस्पताल पुगेकी थिइन् । तर, उपचार तथा स्वास्थ्य परीक्षणका लागि आवश्यक रकम तिर्न नसकेपछि अस्पतालले भर्ना नलिएको र उनलाई बाहिर निकालिएको परिवारजनको दाबी छ ।