यूटीएलको दूरसञ्चार लाइसेन्स खारेज, सम्पत्ति लिलामीको तयारी

लामो समयदेखि दूरसञ्चार सेवा सञ्चालन नगरेको युनाइटेड टेलिकम लिमिटेड (यूटीएल) को अनुमतिपत्र खारेज भएको छ। नेपाल दूरसञ्चार प्राधिकरणको बोर्ड बैठकले कम्पनीको आधारभूत दूरसञ्चार सेवाको लाइसेन्स रद्द गर्ने निर्णय गरेको हो।

प्राधिकरणका अनुसार यूटीएल अहिले सेवा सञ्चालनको अवस्थामा नरहेको र कम्पनीसँग सक्रिय ग्राहकसमेत नभएको देखिएपछि अनुमतिपत्र खारेज गर्ने निर्णय गरिएको हो। निर्णयसँगै कम्पनीको चल तथा अचल सम्पत्ति रोक्का राखेर सरकारी बाँकीसरह रकम असुल गर्ने प्रक्रिया अघि बढाइने भएको छ।