अस्पतालको बिल तिर्न नसक्दा गेटबाहिरै सुत्केरी हुनुपरेको घटनाप्रति सांसदहरूको आपत्ति

काठमाडौँ। अस्पतालको बिल तिर्न नसकेर अस्पतालबाहिर सुत्केरी हुनुपर्ने अवस्था आउनु लज्जास्पद भएको भन्दै प्रतिनिधि सभाका सांसदहरूले सरकारको गम्भीर ध्यानाकर्षण गराएका छन्। बिहीबार बसेको बैठकमा सांसदहरूले सप्तरीको राजविराजस्थित गजेन्द्र नारायण सिंह अस्पतालमा उपचारका लागि पुगेकी एक सुत्केरी महिलाले आर्थिक अभावका कारण अस्पताल बाहिरै बच्चा जन्माउनुपरेको घटनाप्रति चर्को आक्रोश व्यक्त गरेका हुन्।

राष्ट्रिय स्वतन्त्र पार्टीका सांसद खगेन्द्र कर्णले राजविराज नगरपालिका–१४ परसाही टोलकी बबिता पासवान प्रसव पीडाका क्रममा अस्पताल पुग्दा पनि अस्पताल प्रशासनले ३ हजार २ सय रुपैयाँको बिल तिर्न दबाब दिएको र उनीसँग २ हजार ५ सय रुपैयाँ मात्र हुँदा उपचारमा आनाकानी गरिएको बताए। ७ सय रुपैयाँ अपुग भएपछि अस्पतालले उपचार नगरेको र गेटबाहिरै शिशु जन्मिनुपरेको भन्दै उनले यो घटनाले देशको स्वास्थ्य प्रणालीको वास्तविक चित्र प्रस्तुत गरेको उल्लेख गरे। गजेन्द्र नारायण सिंह अस्पताल गरिब, विपन्न तथा निम्न आय भएका नागरिकको भरोसाको केन्द्र भए पनि आर्थिक अभावकै कारण यस्तो अमानवीय घटना घट्नु आपत्तिजनक भएको भन्दै उनले घटनाको सत्यतथ्य छानबिन गरी दोषीलाई कडा कारबाही गर्न माग गरे।