पतञ्जलि जग्गा प्रकरण: विशेष अदालतले माधव नेपालसहित तत्कालीन मन्त्रीहरूलाई बकपत्रका लागि झिकायो

काठमाडौं — पतञ्जलि योगपीठ तथा आयुर्वेद कम्पनी नेपालको सरकारी जग्गा हिनामिना प्रकरणमा विशेष अदालतले पूर्वप्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपालसहित उनी प्रधानमन्त्री रहेका बेला मन्त्रिपरिषद्का सदस्य रहेका मन्त्रीहरूलाई बकपत्रका लागि उपस्थित हुन आदेश दिएको छ।

न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलासले पूर्वमन्त्री मीनेन्द्र रिजालसहित आठ जनालाई अदालतमा बकपत्रका लागि उपस्थित हुन आदेश दिएको हो। आदेशमा पूर्वमन्त्रीहरू मृगेन्द्रसिंह यादव, रकम चेम्जोङ, उमाकान्त चौधरी, महेन्द्रप्रसाद यादव, पदमराज भट्ट र जगन्नाथ पन्तलगायतको नाम समावेश छ। अदालतमा उपस्थित नभए पक्राउ गरी उपस्थित गराउनसमेत पूर्जी जारी गरिएको स्रोतले जनाएको छ।