आठ विश्वविद्यालयले पाउँदैछन् नयाँ नेतृत्व, उपकुलपति छनोटको निर्णायक चरण सुरु

काठमाडौँ- त्रिभुवन विश्वविद्यालयसहित आठ विश्वविद्यालयमा नयाँ उपकुलपति नियुक्तिको प्रक्रिया निर्णायक चरणमा पुगेको छ। पहिलो चरणको छनोट (सर्टलिस्ट) मा परेका उम्मेदवारहरूको अन्तर्वार्ता तथा कार्ययोजना प्रस्तुतीकरण शुक्रबारदेखि सुरु भएको हो।

शिक्षा, विज्ञान तथा प्रविधि मन्त्रालयका अनुसार पहिलो दिन त्रिभुवन विश्वविद्यालय, सुदूरपश्चिम विश्वविद्यालय र लुम्बिनी बौद्ध विश्वविद्यालयका उपकुलपति पदका उम्मेदवारहरूको अन्तर्वार्ता तथा प्रस्तुतीकरण समानान्तर रूपमा सञ्चालन गरिएको छ। बाँकी पाँच विश्वविद्यालयका उम्मेदवारहरूको अन्तर्वार्ता भोलि र पर्सि हुनेछ।