भागेश्वरमा विद्युतीकरणको काम अलपत्र, अन्धकारमै दुर्गम बस्ती

डडेल्धुरा । जिल्लाको पश्चिमी क्षेत्र भारतसँगको सीमा महाकाली नदी किनारसम्म फैलिएको भागेश्वर गाउँपालिकाका दुर्गम बस्तीहरूमा भइरहेको विद्युतीकरणको काम तीन वर्षदेखि अलपत्र अवस्थामा छ । वडा नं. १ अन्तर्गत पर्ने चुडी, बल्काण्डे, पत्रम, काँडेलगायतका बस्तीहरुमा विद्युत विस्तारको काम रोकिएपछि स्थानीय अझै अन्धकारमै बस्न बाध्य छन ।

विद्युत लाइन विस्तारको जिम्मा पाएको निर्माण कम्पनीले केही स्थानमा पोल गाड्ने, तार तान्ने तथा आवश्यक विद्युत सामग्री गाउँसम्म पुर्याउने काम गरे पनि त्यसपछि काम अघि बढेको छैन । गाउँका विभिन्न ठाउँमा तारका गुजुल्टा, पोल तथा अन्य सामग्री खुला रूपमा छोडिएकाले दुर्घटनाको जोखिमसमेत बढेको स्थानीयले बताएका छन ।