'ट्रान्सजेन्डर समुदायबाट सदनमा पुग्दा गर्व लाग्यो'

काठमाडौँ । लैङ्गिक तथा यौनिक अल्पसङ्ख्यक समुदायको प्रतिनिधित्व गर्दै संसदमा पुगेकी भूमिका श्रेष्ठ चर्चामा छिन् । काठमाडौँ क्षेत्र नम्बर ९ की बासिन्दा उनलाई राष्ट्रिय स्वतन्त्र पार्टीले समानुपातिक कोटाबाट प्रतिनिधि सभा सदस्य (सांसद) बनाएको हो ।

सांसद भूमिकाले आफ्नो सङ्घर्ष, संसदीय यात्रा र आगामी कार्यदिशाबारे रातोपाटीसँग खुलेर कुराकानी गरेकी छन् । ‘म र मेरो सम्पूर्ण समुदायका लागि यो गर्वको विषय हो,’ एकदमै उत्साहित देखिएकी उनले भनिन्, ‘तर सदनमा पुग्नुमात्र उपलब्धि होइन, कानुन निर्माण र नीतिगत तहमा रहेर समुदायको अधिकार स्थापित गर्नु मुख्य जिम्मेवारी हो ।’