भाेटेकाेशी बाढी: सन्नाटामा रसुवा

प्रमुख जिल्ला अधिकारीको कार्यकक्षमा बिहीबार दिउँसो करिब साढे २ बजे ५–६ जना व्यक्ति अनुनय गरिरहेका थिए। माथिल्लो त्रिशुली–१ मा आफ्नो भाइ हराइरहेकाले खोजिदिन प्रमुख जिल्ला अधिकारी (प्रजिअ) कमलप्रसाद पाण्डेलाई अनुनय गरिरहेका थिए उत्तम थापा। चार दिनअघि मात्रै रसुवा हाजिर भएका पाण्डेले खोजीमा कुनै कसर बाँकी नराख्ने भन्दै थापालाई सान्त्वना दिए।

त्यस्तै प्रभु बैंक टिमुरेमा कार्यरत भाइ किशोर गौली हराइरहेकाले त्यहाँको अवस्था आफैंले हेर्न पाए हुन्थ्यो भन्दै उनका दाइ र साथीहरू प्रजिअ पाण्डेलाई भेट्न पुगेका थिए। किशोर पैसा राख्ने भल्टको जिम्मेवारीमा रहेको र कार्यालय समयअगाडि नै बाढी आएकाले भागेर कतै गए कि भन्ने झिनो आशा दाइ र साथीमा थियो। त्यसैले खोजी तीव्र पार्न उनीहरूले आग्रह गरिरहेका थिए। बाढीमा आफ्नो अस्तित्वसमेत गुमाएको टिमुरेमा उद्धारकर्मी पठाउन सकिने अवस्था नै छैन भन्दै प्रजिअसँग पनि सम्झाउनुको विकल्प थिएन।