ब्रिटिश इन्टरनेशनल इन्भेस्टमेन्ट र लक्ष्मी सनराइज बैङ्कबीच २ करोड ५० लाख अमेरिकी डलरको कर्जा सम्झौता, साना व्यवसाय र महिला उद्यमीको वित्तीय पहुँच विस्तारमा सहयोग पुग्ने

काठमाडौँ। बेलायतको विकास वित्त संस्था तथा प्रभावमुखी लगानीकर्ता ब्रिटिश इन्टरनेशनल इन्भेस्टमेन्ट (बीआईआई) र लक्ष्मी सनराइज बैङ्क लिमिटेड (एलएसएल) बीच २ करोड ५० लाख अमेरिकी डलर बराबरको कर्जा सुविधा सम्झौता सम्पन्न भएको छ। यस सहकार्यको उद्देश्य नेपालका लघु, साना तथा मझौला उद्यम (एमएसएमई) लाई वित्तीय पहुँच विस्तार गर्नुका साथै विशेष गरी महिला उद्यमीलाई प्रोत्साहन गर्नु हो।

नेपालको कुल गार्हस्थ्य उत्पादन (जिडिपी) मा एमएसएमई क्षेत्रको योगदान करिब २२ प्रतिशत रहेको छ भने यस क्षेत्रले झन्डै २० लाख मानिसलाई रोजगारी प्रदान गरेको छ। तर विश्व बैङ्क र नेपाल राष्ट्र बैङ्कको तथ्याङ्कअनुसार वित्तीय संस्थाको सीमित पहुँच तथा उद्यमीको आवश्यकता र बैङ्किङ प्रक्रियाबीचको असमानताका कारण औपचारिक वित्तीय प्रणालीमार्फत जम्मा १६ प्रतिशत एमएसएमईले मात्र कर्जा सुविधा प्राप्त गर्न सकेका छन्।