भोटेकोशी बाढी: नवलपुरमा १५८ शव भेटियो

नवलपरासी । यही भदौ १० मा रसुवाको भोटेकोशी नदीमा आएको बाढीका कारण बेपत्ता भएकामध्ये शुक्रबार साँझसम्म १५८ जनाको शव नवलपरासी (बर्दघाट सुस्तापूर्व)मा फेला परेको छ । जिल्लामा आज मात्र थप ४८ वटा शव फेला परेको हो ।

नवलपरासी हुँदै बग्ने नारायणी नदीको विभिन्न स्थानमा आज साँझसम्ममा १५८ वटा शव फेला परेको प्रहरीले जनाएको छ । जिल्ला प्रहरी कार्यालय नवलपरासी (बर्दघाट सुस्तापूर्व) का सूचना अधिकारी प्रहरी नायब उपरीक्षक अनिल पण्डितका अनुसार जिल्लामा भेटिएका शवमध्ये १०९ वटा शव मात्र सिङ्गो फेला परेको छ । जिल्लाका विभिन्न स्थानमा भेटिएका शवमध्ये ४९ वटा शवको शरीरका विभिन्न टुक्रा भेटिएका उनले जानकारी दिए ।