मटिअर्वा नाकामा भारतीय पक्षबाट कडाइ

भारतीय सीमा सुरक्षा बलले मटिअर्वा नाकामा सुक्षा जाँचमा कडाइ गरेको छ। भारतीय सीमा सुरक्षा बलले दुई दिनदेखि सुरक्षा जाँचमा कडाइ गर्न थालेपछि भारतीय बजार आदापुर जाने नेपालीले सास्ती खेप्नुपरेको छ। सुरक्षा जाँचका नाममा घण्टौं नाकामा उभिनुपरेको नेपालीले बताएका छन्।

कलैया उपमहानगरपालिका–१० सँग जोडिएको मटिअर्वाबाट आदापुर जाने नेपालीमाथि यसअघि भारतीय सीमा सुरक्षा बलले कुनै रोकटोक गर्दैनथे। नेपाली र सवारीसाधनलाई सजिलै भारत प्रवेश गर्न दिने गरेको तर दुई दिनयता कडाइ गर्न थालेको मटिअर्वाका मनोज प्रसादले बताए। पहिला नेपालीलाई सवारीसाधनसहित सजिलै प्रवेश गर्न दिने भारतीय सीमा सुरक्षा बलले अहिले नेपालीको नागरिकता, सवारीसाधनको कागजपत्र मागेर घण्टांै कुराउन थालेको उनले बताए। भारतीय सुरक्षाकर्मीले घण्टौं कुराउन थालेपछि कतिपय नेपाली पारि नगई फर्किने गरेका छन्।