नेपालले युएईलाई दियो ३१४ रनको लक्ष्य

ओपनर आसिफ शेखको शतकको मद्दतमा एसिसी प्रिमियर कपको फाइनल खेलमा नेपालले युनाइटेड अरब इमिरेट्स (युएई) लाई ३१४ रनको लक्ष्य दिएको छ । मलेसियाको क्वालालाम्पुरस्थित बायुमास ओभलको मैदानमा टस जितेर पहिला ब्याटिङ गरेको नेपालले निर्धारित ५० ओभरमा नौ विकेट गुमाएर ३१३ रन बनायो ।

नेपालका लागि ओपनर तथा विकेटकिपर आसिफ शेखले शतकीय पारी खेल्नुभयो । उहाँले १०६ बलमा आठ चौका र चार छक्कासहित १०२ रनको पारी खेल्नुभएको हो । एकदिवसीय अन्तर्राष्ट्रिय क्रिकेटमा दोस्रो शतक हो । यस्तै, फाइनलमा गुलशनकुमार झाले अर्धशतकीय इनिङ खेल्नुभयो । उहाँले ३८ बलमा चार छक्का र तीन चौकाको मद्दतमा ५२ रनको इनिङ खेल्नुभएको हो ।