उत्तरगयाका बाढी पीडितका लागि पोखरा महानगरपालिकाद्वारा पाँच ट्रक राहत सामग्री हस्तान्तरण

कास्की । पोखरा महानगरपालिकाले रसुवाको उत्तरगया गाउँपालिकाका बाढी तथा पहिरो प्रभावित परिवारका लागि पाँच ट्रक राहत सामग्री पठाएको छ। पोखरामा सङ्कलन गरिएका राहत सामग्रीलाई प्रभावित परिवारका लागि आवश्यक सम्पूर्ण सामानसहित प्याकेज बनाएर उत्तरगया पठाइएको महानगरपालिकाका प्रमुख धनराज आचार्यले जानकारी दिएका हुन्।

एक परिवारका लागि आवश्यक पर्ने भाँडाकुँडा, लत्ताकपडा, सिरक- ब्ल्याङ्केट, नुन, चामल, चम्चा, गिलास र प्रेसर कुकरलगायतका सामग्री पाँचवटा बोरामा प्याक गरिएको छ। यसरी १६५ घरपरिवारका लागि आवश्यक राहत सामग्री तयार पारेर पाँच ट्रकमार्फत पठाइएको हो।