नेपाल एसिया कपमा छनोट, फाइनलमा युएईमाथि शानदार जित

काठमाडौं । एसीसी प्रिमियर कपको उपाधि जित्दै नेपाल एसिया कप क्रिकेटका लागि छनोट भएको छ। मलेसियाको क्वालालम्पुरमा शनिबार भएको फाइनलमा नेपालले यूएईलाई ४५ रनले पराजित गर्दै एसिया कपमा स्थान पक्का गरेको हो । नेपालले दिएको ३१४ रनको लक्ष्य पछ्याएको यूएई २६८ रनमै समेटिएपछि नेपालले उपाधि आफ्नो पक्षमा पारेको हो।

यूएईको पारीमा राहुल चोप्राले शतकीय योगदान दिए। उनले १०५ बलमा तीन चौका र चार छक्कासहित १०४ रन बनाए। शोयब खानले ५२, तानिस सुरीले ४२, हरप्रित सिंहले ३३ र खुजैमा तनवीरले १५ रन जोडे। अन्य ब्याटरले दोहोरो अंकमा रन बनाउन सकेनन्। नेपालका लागि करण केसीले तीन विकेट लिए। ललित राजवंशीले दुई तथा सन्दीप लामिछाने, दीपेन्द्रसिंह ऐरी, रोहित पौडेल र गुल्सन झाले एक–एक विकेट हात पारे।