५ वर्षभित्रै सिक्टा सिँचाइ सक्ने तयारी, ४२ हजार हेक्टर खेतमा पानी पुर्‍याउने

बाँके । बाँकेमा निर्माणाधीन राष्ट्रिय गौरवको सिक्टा सिँचाइ आयोजना आगामी पाँच वर्षभित्र सम्पन्न गर्ने गरी कामलाई तीव्र पारिएको छ । बजेट र जनशक्तिको अभाव नभए अबको पाँच वर्षभित्र पूर्वाधारतर्फका सम्पूर्ण निर्माण कार्य सकिने आयोजनाका निर्देशक राजु आचार्यले बताए ।

सरकारले पाँच वर्षभित्र आयोजना सक्न दिएको निर्देशनअनुसार हाल काम द्रुत गतिमा अघि बढाएको उनले जानकारी दिए । उनका अनुसार हालसम्म आयोजनाको ५१ प्रतिशत भौतिक प्रगति भइसकेको छ भने पूर्वाधार निर्माणमा करिब २४ अर्ब रुपैयाँ खर्च भइसकेको छ । मर्मत सम्भारको काम नियमित चलिरहने भए पनि बाँकी पूर्वाधार निर्माण तोकिएकै समयमा सकिने उनले उल्लेख गरे ।