क्लाइमेट जस्टिसको मुद्दा अन्तर्राष्ट्रिय मञ्चमा उठाउनुपर्छ : प्रचण्ड

जनकपुरधाम, भदौ २७ गते । नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले जलवायु परिवर्तनका कारण नेपालले ठुलो क्षति र जोखिम व्यहोर्नुपरेको भन्दै अन्तर्राष्ट्रिय रूपमा ‘क्लाइमेट जस्टिस’ (जलवायु न्याय) को मुद्दा सशक्त रूपमा उठाउनुपर्ने बताउनुभएको छ ।

शुक्रबार जनकपुरधाम विमानस्थलमा पत्रकारहरूसँग कुराकानी गर्दै दाहालले जलवायु परिवर्तनमा नेपालको योगदान अत्यन्त न्यून भए पनि त्यसको असर नेपालले ठूलो मात्रामा भोगिरहेको उल्लेख गर्नुभयो । नेपालजस्ता जलवायु परिवर्तनमा न्यून योगदान गर्ने मुलुकले भोगिरहेको क्षति, जोखिम र विपत्तिलाई अन्तर्राष्ट्रिय समुदायले न्यायोचित ढङ्गले सम्बोधन गर्नुपर्ने उहाँको भनाइ थियो । दाहालले पछिल्ला प्राकृतिक विपत्तिका घटनाहरू जलवायु परिवर्तनसँग जोडिएको बताउँदै नेपालले आफ्ना समस्या अन्तर्राष्ट्रिय समुदायसमक्ष प्रभावकारी रूपमा उठाउनुपर्नेमा जोड दिनुभयो ।