अन्नपूर्णले जित्यो नेपाल भलिबल लिगको उपाधि

काठमाडौं। अन्नपूर्ण स्पाइकर किंग्सले पहिलो संस्करणको नेपाल भलिबल लिग (एनभीएल) को उपाधि जितेको छ। शनिबार काठमाडौंको त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको फाइनल खेलमा कर्णाली शिवराजलाई सोझो सेटमा पराजित गर्दै अन्नपूर्ण च्याम्पियन बनेको हो।

अन्नपूर्णले कर्णालीलाई २५-१५, २५-२० र २५-१८ को सोझो सेटमा हराउँदै उपाधि उचालेको हो। लिग चरणको पहिलो खेलमा कर्णालीसँग ३-१ सेटले पराजित भएको अन्नपूर्णले फाइनलमा बदला लिएको छ। उपाधिसँगै अन्नपूर्णले २० लाख रुपैयाँ पुरस्कार प्राप्त गरेको छ।