दास व्यापारको क्षतिपूर्ति र माफी माग गर्दै अफ्रिकी तथा क्यारिबियन देश

आक्रा । अफ्रिकी र क्यारिबियन देशहरूले ट्रान्सअटलान्टिक दास व्यापारबाट लाभ उठाएका शक्तिशाली राष्ट्रहरूसँग औपचारिक रूपमा माफी माग्न र क्षतिपूर्ति दिन माग गरेका छन्। घानाको राजधानी आक्रामा सम्पन्न तीनदिने ‘नेक्स्ट स्टेप्स’ सम्मेलनको समापनसँगै क्षतिपूरक न्यायको अभियानलाई अगाडि बढाउने उद्देश्यका साथ यो माग अघि सारिएको हो।

यसअघि मार्च महिनामा संयुक्त राष्ट्रसंघले एउटा ऐतिहासिक प्रस्ताव पारित गर्दै ट्रान्सअटलान्टिक दासतालाई ‘मानवताविरुद्धको सबैभन्दा गम्भीर अपराध’का रूपमा मान्यता दिएको थियो। उक्त प्रस्तावले सदस्य राष्ट्रहरूलाई क्षतिपूर्ति कोषमा योगदान गर्नसमेत आग्रह गरेको थियो। १५औँदेखि १९औँ शताब्दीसम्म करिब १ करोड २० लाखदेखि १ करोड ५० लाख अफ्रिकी पुरुष, महिला र बालबालिकालाई जबरजस्ती पक्राउ गरी दासका रूपमा काम गराउन अमेरिकातर्फ तस्करी गरिएको इतिहास छ।